البداية كانت في قرار اتخذته في نوفمبر 2013 " ابغى اتكلم وافهم إنجليزي"! ومن هنا بدءت تجربتي في تعلم اللغة الإنجليزية.


 
















كلمت اكثر من معهد عشان اسجل عندهم وكان المستوى الواحد وقتها ٢٥٠٠ريال وما كانت عندي القدرة المالية على التسجيل في المعاهد بسبب ارتفاع رسوم التسجيل.



اتحطمت جداً وكنت اعتقد ما راح اتقن اللغة الإنجليزية لإني ما دخلت معهد وما كان عندي معلم يدلني على الصح والغلط!

 


لكن مع هذا قلت بجرب اتعلم بنفسي طالما اليوتيوب وقوقل موجودة وفعلاً بديت باليوتيوب اول شيء وكنت مقرره اتعلم زي م يتعلم العربي لما يبتعث بالخارج يعني انجليزي-انجليزي ولقيت كورس مولي ستون للمبتدئين



وبديت معاها وفعلاً حسيت اني جالسه اتعلم شيء وكل درس اعرف معلومة جديدة وخلصت المستوى الاول وبروح للمستوى الثاني منه وكانت معلمه مختلفة ما تحمست معاها زي مولي ستون ورجعت تحطمت ولاني ما اعرف حتى طرق البحث الصحيح على اليوتيوب ما عرفت وين اروح!



وخلال بحثي على الانترنت قريت موضوع عن قصص اكسفورد وتحمست لها ، وكان عند اختي قاموس اكسفورد جبته وبديت بالقصص المتوفرة على النت "تبدء من صفر الى 6" بديت من مستوى صفر بالقصص اقرء واترجم وطبعاً كان المستوى صفر فيه كلمات مالوفة زي وردة وكتاب وسيارة وكلمات لابأس فيها اللي هي اول الاشياء اللي تعلمنها اول م دخل عندنا الانجليزي في سادس ابتدائي ولانا كنا متحمسين ما نسيتها طبعاً "ضحكة" فتحمست لما كنت اشوف كلمات اعرفها، وفعلاً جلست اقرء فيها الى المستوى الرابع ومستواي صار افضل بالقراءة يعني لما اقرء التدوينات الشخصية للأشخاص كنت افهم معظم اللي اقراه ولأني جربت اسمع إنجليزي وما قدرت افصل الكلمات من سرعة الكلام بالنسبة لي وقفت قصص اكسفورد وحكمت عليها نوعاً ما بالفشل لأني كنت سامعه ان المستوى الرابع وما بعد تبدء تقرء كتب عادية غير مخصصة للمتعلمين، طبعاً هذه الفكرة كانت غلط لان مشكلتي كانت في مهارة الاستماع لأني ما كنت اسمع ابداً وليس القراءة.

 


بعدها قررت اجرب سيديهات كان اخويا اشتراها من مدرسته وجلست كما سنة محد تعلم منها "يعني اشترينها وحطينها بالمكتبة ديكور "بعد ضحكة"

 


المهم جبتها وبديت من جديد من سيدي رقم واحد وكان الاستماع فالبداية كان صعب جداً بعدين مع التكرار بدئت تصير اسهل لما وصلت عند السيدي الخامس كان عن المحادثة ما عجبتني الطريقة لتطوير مهارة المحادثة ورجعت وقفت كالعادة!

 


وجلست بعدها فترة على الفيديوهات المختلفة وبمستويات مختلفة زي يوتيوب engvid كنت استفيد من بعض الأشياء بس بالعموم لا لان مستواي لسا مبتدئ احتاج تأسيس بخطة واضحة مو معلومة من هنا ومعلومة من هناك بشكل عشوائي!

 


لقيت بعد سنتين تقريباً فيديوهات Aj hoge اعجبتني ثقته بنفسه بس مرره كنت مترددة وقتها إني اشتري منه كورس لأني راح اتسلف فلوسه طبعاً فلازم اكون واثقة منه.

 


المهم اخذت فترة اشوف طريقته واسمع له لين يوم وانا ابحث عن كورس Aj  لقيت بنت منزلة فيديو " تجربتي بتعلم اللغة الانجليزية مع AJ HOGE " وقد ايش استفادت من طريقته وكورسه وقررت اشتريه سمعت الكورس وبهذا الوقت من الحماس كتبت في سيرتي الذاتية اني اعرف انجليزي متوسط المهم دقوا عليا لعمل مقابلة هاتفية بالإنجليزي وما يحتاج اكمل الباقي اكيد عرفتوا ايش صار بعد بعد ضحكة طويلة"

 


المهم بعد ما خلصت الكورس استفدت منه جداً بمهارة الاستماع والمحادثة نوعاً ما ، صرت اسجل لنفسي فيديوهات بالإنجليزي ما كانت تتعدا الدقيقة بس كان انجاز بالنسبة ليا وقررت اكمل واشتريت من عنده كورس ثاني واشتريت كورس هو شريك فيه والتعلم بنفس طريقته كان خاص بتعلم اللغة الانجليزية في الحياة العادية اقصد كا استخدام المفردات و الجمل العامية ولليوم مستمرة بطريقته.

 


وخلال هذا الفترة اكتشفت إني عندي معتقد إن التعلم الحر او الذاتي غير مجدي وما يوصل لمكان وهذا المعتقد النفسي أعاقني كثير عن سرعة التعلم الذاتية ابدء واوقف كل مره حتى بعد مرور سنة ونص على بداية تعلمي بنفسي! يعني عشان انتقل من مستوى الى مستوى اعلى كان يأخذ مني ٦ شهور الى 8 شهور تقريباً! وهذا كان سبب الاحباط لكن صار التغير متى؟ لما آمنت بنفسي بعد ما شفت الناس اللي حولي من اللي دخلوا معاهد لغة انجليزية كانت لغتي افضل منهم وأنا تعليم ذاتي و من هنا استوعبت ممكن اتعلم مهارة بدون الدراسة التقليدية! صح ضيعت وقت كثير بس المهم إني عرفت مشكلتي " العلم غير مختصر على مدرسة , جامعة أو معهد "  وحليتها وهذا فادني بعدين بتعلم مهارات ثانية بوقت اقل من الوقت اللي كنت ارح اضيعه لو اخذت المهارة بمعهد عادي " المهم تعرف معتقداتك عن نفسك والطرق اللي تستخدمها وتصححه لان الجانب النفسي جداً مهم فوق ما تتصور".

 


نرجع نكمل لما استخدمت كورس Aj كنت بنفس الوقت اقرء كتب ، كل شهر كتاب وطريقتي بالقراءة كانت الكلمة اللي ما اعرفه احط تحتها خط واكمل ما ارجع لها ، وخلال هذا السنة تطورت عندي مهارة الاستماع والقراءة جداً بشكل ملحوظ وزادت ثقتي بنفسي اكثر وصرت اطبق طريقة Aj  بالتعلم على المصادر الاخرى للغة الانجليزية وابحث دايما عن طرق تعلم جديده.

 


"طريقة Aj hoge  مفيده فقط للاستماع والمحادثة وليس القراءة والكتابة"

 


 طريقة اخرى فادتني بحفظ الكلمات وهيا: " طريقة التكرار المتباعد" اشتريت كتب لتعلم المفردات الانجليزية وصرت اطبق عليها هذا الطريقة تنحفظ الكلمة بعقلك لمدة طويلة ولما تستخدمها او تسمعها تنحفظ للابد وهذه الطريقة صرت استخدمها بعد عند تعلمي للمهارات الثانية غير اللغات.

 


استخدمت طرق اخرى مثل كامبلي للمحادثة حلو الموقع بس لازم يكون عندك هدف من دخولك للمحادثة وبعدين تجرب كذا معلم لين تلقى اللي بيوصلك اسرع لهدفك ويمشي معك خطوة خطوة من خلال وضع خطة تناسبك ، وهذاموضوع راح يساعدك تقرر اذا يناسبك أو لا..

 


جربت انجلش تاون شهر ، حلو مو سيء كل المحتوى موجود عندك وعندك ٢٠ حصة محادثة مع طالبين غيرك لكن انا مو مره اندمجت معاه لكن هذا ما يعني أنه ماراح يناسبك أنت بعد.

 


جربت قناة ذا امريكان انجلش كورس الكتابة , كنت أعرف اكتب بس اكتشفت أخطاء بسيطة أثرت على مستوى كتابتي فالشخص هذا شرحه بطل.

 


كنت استخدم برنامج Hellotalk  لتطوير مهارة الكتابة : أكتب موضوع عن شيء معين أو عن شيء صار معايا بيومي وأكتب لهم صححوا لي , ويصحح لي أكثر من شخص بطريقة مختلفة وهذا كان يبين لي أن أقدر أعبر عن أي شيء شفهي أو كتابي بككذا طريقة , وهذا أعطاني راحه بالتعبير.

 


واستخدمت تطبيقات كثيرة جداً busuu, duolingo,   وتطبيقات للاستماع وحفظ الكلمات ومن كل شيء جربته استفدت شيء.

 


تعلمي للغة الإنجليزية خلاني اكتشف نفسي وقدراتي بالصبر والالتزام والانضباط وأعرف الضعيف منها وأطورها والقوي استمر فيه والأجمل الاستفادة استمرت لكل المهارات اللي بعدها .

 


مستواي اليوم هو تراكمت جميع الطرق اللي جربتها , اليوم انا اقرء كتب لكتاب معروفين واسمع محاضرات واشترك بدورات محتواها كلها انجليزي ولسا مستمرة بتطوير لغتي وتقوية الجوانب الضعيفة منها.

 


بالنسبة لي | لماذا المعاهد ليس خيار جيد دائماً ؟

مشكلتي مع المعاهد كانت فلوس بالبداية لكن لما جربت ودخلت معهد لتعلم مهارة معينة ما تطورت عندي غير لما كتبت لنفسي خطة شخصية بمصادر خارجية امشي عليها وكانت فائدة المعهد جداً قليلة"  فـ صارت مشكلتي مع المعاهد فلوس مبالغ فيها ، معلم ليس احترافي طبعا هذا الكلام للبعض وليس الكل , ووقت طويل لتبرير قيمة المبلغ اللي دفعته!

لكن لو القى لي معلم يأسسني صح باللغة او بالمهارة اللي انا ابغى اتعلمه اكيد ما راح استخسر فلوسي فيه لأنه راح يختصر علي وقت كثير من خبرته المهم يكون معلم احترافي.

 



دروس مهمه تعلمتها:

1- الجانب النفسي جداً مهم أعرف نفسك , أعرف معتقداتك حسنها وطورها دائماً وكون واثق بنفسك وبقدرتك على التعلم والتطور.

واسئل نفسك دائماً :

أين المشكلة في عدم قدرتي على تعلم اللغة؟

وهل فيه احتمال واحد بالمية أني أتعلم اللغة الإنجليزية وأتقنها؟

" أبحث عن طريقة الرايك والرايك المعكوس لمحمد كيلاني"

 

2- الانضباط الذاتي مهم وهو الأساس للنجاح ، واذا بديت بشيء لا توقفه حتى تخلصه للنهاية ، عشان تحكم صح أذا كان مفيد لك أو لا.

"أقرء كتاب قوة الانضباط الذاتي بريان تريسي أو شوف له محاضرات عن اليوتيوب"

" اعرف أكثر عن السعي النفسي احمد عمارة "

 

3- تعلم مهارة البحث الصحيحة عن طريق اليوتيوب وقوقل وحتى السوشيل ميديا.

 

4- أقرء أو شوف فيديوهات لأشخاص يتكلموا عن تجربتهم فتعلم اللغة أو أي مهارة أخرى تريد أن تتعلم نفسه ، ستجد طرق ستُفيدك وتكون تحفيز لك وأنت تشوف كل الأشياء اللي مر فيه ووصل بالنهاية.

 

5- جرب طرق مختلفة لا توقف على طريقة وحدة وتقول ما يناسبني تعلم اللغة أو صعبه عليا! راح تكتشف بالأخير طريقة تلائمك للتعلم وتختصر عليك وقت كثير في امتلاك المهارة.

 

6- لا تحكم على الأشخاص أول المعلمين من أول مرة بسبب أسلوبه أو شخصيته يمكن يكون عنده علم أو طريقة بتفيدك كثير اعطي نفسك فرصة تستفيد من كل شخص تقابله أو تعرفه.

 

7- باللغة مهم أنك تعرف توصل فكرتك ويفهمه الشخص الآخر ومع الوقت الأشياء الصغيرة زي القرامر واختيار الكلمات المناسبة بتتطور بدون ما تلاحظ.

 

8- ما فيه طريقة فاشلة بس فيه طريقة أقل تأثير , يعني من كل طريقة راح نتعلم منها شيء لو كان بسيط.

 


هنا تقريباً كل الأشياء عن تجربتي بتعلم اللغة الانجليزية ومدى استفادتي من كل طريقة واذا اتذكرت شيء جربته وما كتبته راح احدث الموضوع ، أتمنى من ربي أن يستفيد كل شخص يقرء الموضوع من جمل مباشرة أو ألهمته لشيء بشكل غير مباشر يعلم الله إني كتبته بنية النفع بالتوفيق لي ولكم.


وأنت كيف كانت تجربتك بتعلم الانجليزية؟

 

 

 

 

 

 

 

تعليقات

0
إرسال تعليق عرض جميع التعليقات أخفاء الردود
الاسم
بريد إلكتروني *
رسالة *